नेपाल टेलिकमको जिप दुर्घटना : तीन जनाको मृत्यु

बाजुरा। बाजुराको जगन्नाथ गाउँपालिकामा नेपाल टेलिकमको जिप दुर्घटना हुँदा तीन जनाको मृत्यु भएको छ। मृतकमध्ये एक जना नेपाल टेलिकम बाजुरा कार्यालयका प्रमुखसमेत रहेका छन्।

जिल्ला प्रहरी कार्यालयका अनुसार धनगढी उपमहानगरपालिका निवासी तथा नेपाल टेलिकम बाजुरा कार्यालय प्रमुख ५५ वर्षीय लोकबहादुर खड्का, जिप चालक ४० वर्षीय करन महतरा र बडीमालिका नगरपालिका–७ का २८ वर्षीय रवीन्द्र धामीको  मृत्यु भएको हो।

दुर्घटनामा अन्य दुई जना घाइते भएका छन्, उनीहरूको अहिले कोल्टीस्थित आधारभूत अस्पतालमा उपचार भइरहेको छ।

जिप नेपाल टेलिकमको टावरमा सोलार प्यानल जडान गर्न पिलुचौरबाट गएको थियो। सोही क्रममा जिप अनियन्त्रित भई दुर्घटना भएको प्रारम्भिक  अनुसन्धान भएकाे प्रहरीले बताएको छ।

दुर्घटनाबारे थप अनुसन्धान भइरहेको प्रहरीले जनाएको छ।