जुम्लामा अटो दुर्घटना हुँदा चालकको मृत्यु

जुम्ला।  जुम्लाको तिला गाउँपालिका–४ भोटचौरमा अटो दुर्घटना हुँदा चालकको मृत्यु भएको छ। दुर्घटनामा ४४ वर्षीय रणबहादुर कुँवरको ज्यान गएको जुम्ला प्रहरीले जानकारी दिएको छ।

शुक्रबार तातोपानी गाउँपालिका–१ स्थित राँका गाउँबाट तातोपानी–७ सर्मीगाउँतर्फ धानको बेर्ना लिएर जाँदै गरेको अटो क १ ह ३१ नम्बर सडकबाट करिब ६० मिटर तल खस्दा दुर्घटना भएको हो।

प्रहरी चौकी कुडारीका हवलदार बैजु महतोका अनुसार दुर्घटनामा गम्भीर घाइते भएका चालक कुँवरलाई तत्काल कर्णाली स्वास्थ्य विज्ञान प्रतिष्ठान शिक्षण अस्पताल, जुम्ला ल्याइएको थियो। उपचारको क्रममा बिहान ५:४० बजे उनको मृत्यु भएको अस्पतालले  घाेषणा  गरेको छ।

दुर्घटनाको कारणबारे अनुसन्धान भइरहेको प्रहरीले जनाएको छ। मृतकको शव हाल कर्णाली स्वास्थ्य विज्ञान प्रतिष्ठानको शवगृहमा राखिएको छ।

प्रहरीले अटो दुर्घटनाको कारण पत्ता लगाउन थप अनुसन्धान गरिरहेको जनाएको छ।