जुम्लामा चट्याङ लागेर यार्सागुम्बा संकलनमा गएकी महिलाको मृत्यु

जुम्ला । जुम्लामा चट्याङ लागेर एक महिलाको ज्यान गएको छ। तातोपानी गाउँपालिका–८ टोप्ला गाउँकी २७ वर्षीया कल्पना शाहीको बिहीबार दिउँसो चट्याङ लागेर मृत्यु भएको हो।

जिल्ला प्रहरी कार्यालय जुम्लाका प्रहरी नायब उपरीक्षक (डीएसपी) रवीनबाबु रेग्मीका अनुसार शाही सुब्बाकुना पाटनमा यार्सागुम्बा संकलनका लागि गएकी थिइन्। संकलनको क्रममा अपराह्न ४ बजेतिर चट्याङ लाग्दा घटनास्थलमै उनको ज्यान गएको जानकारी प्राप्त भएको छ।

प्रहरीका अनुसार घटनाबारे जानकारी पाउनासाथ जिल्ला प्रहरी कार्यालयबाट टोली घटनास्थलतर्फ पठाइएको छ।

हाल घटनाको थप अनुसन्धान भइरहेको प्रहरीले जनाएको छ।