मुगु कर्णाली नदीमा यार्सा संकलन गर्न गएका युवक बेपत्ता

मुगु । यार्सागुम्बु संकलन गर्न मुगुका एक युवक गएका बेला कर्णाली नदीमा खसेर बेपत्ता भएका छन्। मुगुम कार्मारोङ गाउँपालिका–५, सेरोग गाउँका ४० वर्षीय सेराप साग्बु लामा बिहीबार साँझ यार्सा संकलनका लागि घरबाट निस्किएका थिए।

जिल्ला प्रहरी कार्यालयका अनुसार सेराप पाटन क्षेत्रतर्फ जाँदै गर्दा सिरानी चौरस्थित कर्णाली नदीमाथि राखिएको अस्थायी काठको पुलबाट चिप्लिएर नदीमा खसेका हुन्। घटना बिहीबार राति करिब ८:३० बजे भएको मुगुम कार्मारोङ गाउँपालिकाकी उपाध्यक्ष छिरिङ पुटिक तामाङले पुष्टि गरेकी छन्।

गाउँपालिकाले सर्वसाधारणका लागि जेठ १३ गतेबाट मात्रै यार्सा संकलन खुला गर्ने सूचना सार्वजनिक गरेको भए पनि सेराप त्यसअघि नै पाटन क्षेत्रतर्फ लागेका थिए।

हालसम्म बेपत्ता सेरापको खोजी कार्य जारी रहेको प्रहरीको भनाइ छ।