कृषिसमूह तथा कृषि सहकारी संस्था लाई ५० प्रतिशत अनुदानमा कृषियन्त्र बितरण

सुर्खेत। सुर्खेतको चौकुनेगाउँपालिकाले उत्पादनमा वृद्धिसँगै व्यावसायिक कृषिमा प्रोत्साहन गर्ने उद्देश्यले चौकुनेगाउँपालिका भित्रका कृषि समुह , कृषि सहकारीलाई ५० प्रतिशत अनुदानमा कृषियन्त्र वितरण गरेको छ ।चौकुने गाउँपालिका भित्रका १२ वटा कृषि समुह र कृषि सहकारीलाई अत्याधुनिक मिनी ट्रेलर वितरण गरिएको छ ।चौकुने गाउँपालिका कृषि शाखा प्रमुख लोकमणी जोशीले कृषि उत्पादन बढाई कृषिलाई व्यावसायिक बनाउन पालिका भित्रका कृषि समुह र कृषि सहकारीलाई मिनि ट्रेलर बितरण गरिएको बताउनुभयो ।

उहाँले अनुदान पाउनका लागि निवेदन दर्ता गराएका कृषि सहकारीहरुको अनुगमन गरी ५० प्रतिशत अनुदान पाउने कृषि सहकारीहरु छनोट गरेर यन्त्र उपलब्ध गराइएको बताउनुभयो । सो अवसरमा अनुदान पाएका कृषि सहकारीले यो सहयोगबाट कृषिलाई व्यावसायिक बनाउन ठूलो सहयोग पुग्ने जनाउँदै यसले उत्पादन पनि वृद्धि हुने विश्वास गरिएको छ । चौकुने गाउँपालिका वडा न -७ मा रहेको श्री सिद्धेश्र्वरी बालगृहमा अनाथ बालबालिकालाई कृषिमा आबद्ध गराउनको लागि चौकुने गाउँपालिका कृषि शाखाले कृषियन्त्र उपलब्ध गराएको बालगृहका ब्यवस्थापक देवानन्द धमालाले बताउनुभयो ।

चौकुने गाउँपालिकाका अध्यक्ष खडक बिवस वासपानेले ” दिगो र तिब्र बिकास चौकुनेको रहर ,गुणस्तरीय शिक्षा र ब्यबसायिक कृषिमा लहर”” भन्ने मुल नारालाई आत्मसात गर्दै अधिकांश कृषि समुह र कृषि सहकारीलाई व्यावसायीकरण गर्न आधुनिक उपकरणले सो कामलाई सहज बनाउने बताउनुभयो उहाँले आधुनिक कृषियन्त्रको सहाराले कृषिमा ठूलो परिवर्तन आउने पनि बताउनुभयो ।

४५ हजार मूल्य पर्ने मिनी ट्रेलरलाई अनुदानमा उपलब्ध गराउँदा कृषिसमूह तथा कृषि सहकारीलाई २२,५६४( बाईस हजार पाँचसय छ चौसठ्ठी ) मात्र परेको उहाँले जानकारी दिनु भएको छ। उहाँका अनुसार पछिल्लो समयमा किसानहरुले गाईगोरु पाल्न छाड्दै गएका छन् । जोत्नका लागि प्रयोग गरिने गोरु पाल्न छाडेपछि खेतीपातीमा समस्या हुँदा खेतबारी बाँझै हुने अवस्थामा पुगेका छन् । खेतबारी बाँझो हुन नदिन र किसानलाई खेतीपातीतिर उत्साहित गर्न चौकुने गाउँपालिकाले अनुदानमा मिनी ट्रेलर वितरण गरेको अध्यक्ष बासपानेले बताउनुभयो ।

एकातिर किसानले गाईगोरु पाल्न छाडेका र अर्कोतिर परम्परागतभन्दा यान्त्रिक उपकरणले खेतबारी खनजोत गर्दा कम लागत पर्ने र छिटो-छरितो हुने भएकाले कृषि समुह र।कृषि सहकारीको मागअनुसार मिनी ट्रेलर वितरण गरेको चौकुने गाउँपालिकाका कृषि शाखा प्रमुख लोकमणी जोशीले बताउनुभएको छ ।