लोडसेडिङ दैनिक बाह्र घण्टा

हिमाली जिल्ला हुम्लाको सदरमुकाम समेत रहेको सिमकोट र खार्पुनाथ गाउँपालिकामा दैनिक बाह्र घण्टा लोडसेडिङ हुने गरेको छ । उपभोक्ताको माग बढी र हिल्दुम विद्युत् वितरण केन्द्रले उत्पादन गर्ने विद्युत् कम भएको कारण लोडसेडिङ समय बढेको हो । सोबर्ण खाद्य उद्योगका सञ्चालक मुकुन्द रोकायाले लोड सेडिङ समय वृद्धि भएको कारण आफ्नो कुटानी पिसानी मिल समस्यामा परेको बताउनुभयो । उहाँले दैनिक बाह्र घण्टासम्म बिहानदेखि राती नौ बजेसम्म लोडसेडिङ हुँदै आएको बताउनुभयो । स्थानीयहरू दैनिक तेल पेल्न र अन्न पिस्न आउने भए पनि लोडसेडिङका कारण समयमा काम गर्न नपाउने उहाँले बताउनुभयो ।

बिस केजी जौ पिस्नका लागि एक दिन पालो कुरेर पिस्नुपर्ने बाध्यता रहेको बताउँदै उहाँले यसले गर्दा उद्योग नै धरापमा परेको बताउनुभयो । त्यसैगरी बढ्दो लोडसेडिङले प्रिन्टिङ प्रेस, फर्निचर उद्योग, इलेक्ट्रोनिक्सका व्यवसाय सबैलाई प्रभाव पारेको छ । केन्द्रका प्रमुख जितेन्द्र यादवले विद्युतको माग बढी र उत्पादन कम भएको कारण दैनिक लोडसेडिङ समय बढिरहेको बताउनुभयो । मुख्यगरी पावर हाउसका लागि आवश्यक पर्ने पानीको स्रोत कम भएको कारण आयोजनाले क्षमता अनुसारको विद्युत् उत्पादन नहुँदा लोडसेडिङ समस्या भइरहेको उहाँले बताउनुभयो । हाल सदरमुकाम सिमकोटमा मात्र पिक समयमा सात सय किलोवाट माग हुने गरेको र अरू बेला चारदेखि पाँच सय किलोवाट विद्युतको माग हुने गरेको उहाँको भनाइ छ ।

राती दश बजेबाट बिहान छ बजेसम्म भने लोडसेडिङ हुने गरेको छैन । त्यसैगरी सिमकोट गाउँपालिकाका अन्य छ वटा वडा र खार्पुनाथ गाउँपालिकाका चार वटा वडामा गरी दुई सय किलोवाट विद्युतको माग रहेको बताउँदै उहाँले केन्द्रले जम्मा डेढ सय विद्युत उत्पादन गरिरहेको कारण लोडसेडिङ समय नबढाउनुको विकल्प केन्द्रसँग नभएको बताउनुभयो । पाँच सय किलोवाट विद्युत् उत्पादन गर्ने क्षमता भएको केन्द्रले कहिल्यै पनि पूरा क्षमताको विद्युत् उत्पादन गर्न सकेको छैन । लोडसेडिङका कारण विद्युतसँग सम्बन्धित अन्य व्यवसाय मर्कामा परेका छन् भने वित्तीय कारोबार गर्ने निकायहरू कार्यालयमा सोलार जडान गर्न बाध्य हुँदै आएका छन् । हालसम्म हुम्ला जिल्ला राष्ट्रिय प्रसारण लाइनमा जोडिएको छैन ।