कर्णाली नदीमा बेपत्ता दुई किशोरको खोजी गर्न गोताखोर परिचालन

सुर्खेत । कर्णाली नदीमा बेपत्ता भएका दुई किशोरको खोजीका लागि शसस्त्र प्रहरी बलका गोताखोर टोली परिचालन गरिएको छ। कालिकोट र दैलेख जिल्लामा शुक्रबार छुट्टाछुट्टै घटनामा बेपत्ता भएका किशोरहरूको खोजी शनिबारदेखि तीव्र पारिएको हो।

कालिकोटको पचालझरना गाउँपालिका–८ स्थित कर्णाली नदीमा नुहाउने क्रममा नरहरिनाथ गाउँपालिका–१ का १६ वर्षीय विराज बिष्ट बेपत्ता भएका थिए। उनको खोजीका लागि सशस्त्र प्रहरी बल नेपाल नं। ६ महेश्वरी बाहिनी, सुर्खेतबाट पाँच सदस्यीय गोताखोर टोली घटनास्थलमा खटाइएको छ।

यसैगरी, दैलेखको चामुण्डा विन्द्रासैनी नगरपालिका–९ स्थित कर्णाली नदीमा अन्दाजी १६ वर्षीय भुवन सार्की बेपत्ता भएका छन्। उनको खोजी कार्य माथिल्लो कर्णाली जलविद्युत आयोजनाको सुरक्षा बेस डावमा खटिएका शसस्त्र प्रहरी टोलीले खाेजि रहेको  प्रहरिले जनाएकाे छ ।

शुक्रबार घटेका दुबै घटनापछि स्थानीयवासी तथा सुरक्षाकर्मीहरूको सहयोगमा खोजी कार्य जारी राखिएको भए पनि हालसम्म कुनै सफलता प्राप्त भएको छैन। प्रहरीले नदीको बहाव तेज भएकाले खोजीमा कठिनाइ भइरहेको जनाएको छ।