आँबुखैरेनीभित्रका विद्यार्थीहरूको उपचार अब निःशुल्क

तनहुँ — आँबुखैरेनी गाउँपालिकाले पालिकाभित्र रहेका विद्यालयका विद्यार्थीको उपचार अब निःशुल्क गर्ने निर्णय गरेको छ। गाउँपालिकाको शिक्षा समितिको निर्णय अनुसार, कुनै पनि विद्यार्थी बिरामी परेमा आँबुखैरेनी अस्पतालमा हुने सम्पूर्ण उपचार निःशुल्क हुनेछ।

गाउँपालिकाका अध्यक्ष शुक्र चुमानले निजी तथा सामुदायिक विद्यालयका सबै विद्यार्थीलाई यो सुविधा उपलब्ध हुने जानकारी दिएका छन्। उनले भने, “विद्यार्थीको हितमा गरिएको यो निर्णय अन्य अस्पतालमा लागू नहुनेछ।”

शिक्षा समितिको बैठकले पुनः भर्ना शुल्क र वार्षिक शुल्क नलिने निर्णय पनि गरेको छ। केही विद्यालयले भर्ना शुल्क असुली गरेको गुनासो आएपछि उक्त विषयमा पालिकाले चासो देखाएको अध्यक्ष चुमानले बताए। निजी विद्यालयका प्रतिनिधिसहितको बैठकबाटै यो निर्णय गरिएको हो।

स्वास्थ्य सेवाको पहुँच वृद्धि गर्दै गाउँपालिकाले आँबुखैरेनी स्वास्थ्यचौकीलाई वि.सं. २०७९ मंसिर १ गतेदेखि १५ शय्याको अस्पतालमा स्तरोन्नति गरेको छ। उक्त अस्पतालले तनहुँको आँबुखैरेनीसँगै बन्दीपुर, गोरखाको पालुङटार, सहिद लखन र चितवनको इच्छाकामना क्षेत्रका बासिन्दालाई सेवा दिइरहेको छ।

गाउँपालिका अहिले शिक्षा सुधार अभियान सञ्चालन गरिरहेको छ। अध्यक्ष चुमानका अनुसार, “हामी छ वडाका ३५ सामुदायिक विद्यालय सुधारका लागि योजनाबद्ध रूपमा अगाडि बढिरहेका छौं।” ती विद्यालयमा हाल करिब ५०० विद्यार्थी अध्ययनरत छन्।