महिला एसियन कप छनोट : नेपाल र उज्बेकिस्तान एकै समूहमा

काठमाडौं – एएफसी महिला एशियन कप २०२६ को छनोट चरणका लागि नेपाल समूह ‘एफ’ मा परेको छ। नेपाल रहेको समूहमा उज्बेकिस्तान, लाओस र श्रीलङ्का छन्।

यो समूहका खेलहरू आउँदो जुन महिनामा उज्बेकिस्तानमा हुनेछन्। फिफा वरीयतामा उज्बेकिस्तान ५०औं स्थानमा रहेको छ भने नेपाल ९९औं स्थानमा छ। लाओस १०७औं र श्रीलङ्का १५८औं स्थानमा छन्।

महिला एशियन कप छनोटका लागि ३४ टोलीलाई ८ समूहमा विभाजन गरिएको छ। प्रत्येक समूहका विजेताले २०२५ मार्चमा अस्ट्रेलियामा हुने मुख्य प्रतियोगिताका लागि स्थान बनाउनेछन्।

यसअघि आयोजक अस्ट्रेलियासँगै चीन, दक्षिण कोरिया र जापानले एशियन कपमा आफ्नो स्थान पक्का गरिसकेका छन्। कुल १२ टोलीले मुख्य प्रतियोगितामा प्रतिस्पर्धा गर्नेछन्।