सरकारको कुलमान घिसिङलाई हटाउने तयारी जारी

नेपाल विद्युत् प्राधिकरणका कार्यकारी निर्देशक कुलमान घिसिङलाई हटाउने सरकारको तयारी एक पटक फेरि अघि बढेको छ। सोमबार साँझ आयोजित मन्त्रिपरिषद बैठकमा उनलाई कार्यकारी निर्देशकको पदबाट हटाएर अन्यत्र सरुवा गर्ने प्रस्ताव दर्ता भएको स्रोतले जानकारी दिएको छ।

ऊर्जा तथा जलस्रोत मन्त्रालयले घिसिङको स्थानमा नयाँ पद सिर्जना गरेर सरुवा गर्ने तयारी गरेको छ। यस प्रस्ताव अनुसार, घिसिङको स्थानमा प्राधिकरणका वरिष्ठ उपकार्यकारी निर्देशकमध्ये दीर्घायुकुमार श्रेष्ठलाई जिम्मेवारी दिइने सम्भावना छ।

प्रधानमन्त्री केपी शर्मा ओली र ऊर्जामन्त्री दीपक खड्काले लामो समयदेखि घिसिङलाई पदबाट हटाउन प्रयास गरिरहेका छन्। यसअघि पनि चारपटक घिसिङलाई प्रष्टीकरण सोधिएको थियो। ऊर्जामन्त्री खड्का भने यस प्रक्रियामा विशेष सक्रिय रहनु भएको छ, जसको कारण कांग्रेसभित्र केही विरोधका स्वर पनि उठेका छन्।