काठमाडौँमा चोरीको २० किलो चाँदीसहित पाँच जना पक्राउ

चोरी पैठारी गरी ल्याइएको २० किलो चाँदीसहित काठमाडौँबाट पाँच जना पक्राउ परेका छन्।

राजस्व छलीका चाँदीको कारोबार भइरहेको विशेष सूचनाका आधारमा काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई काठमाडौँ महानगरपालिका–३२ नरेफाँटबाट पक्राउ गरेको हो।

पक्राउ पर्नेहरूमा बाराका ३४ वर्षीय सन्तोषकुमार साह, ३५ वर्षीय प्रेमकुमार कुशवाहा, २६ वर्षीय गणेश साह, २१ वर्षीय विपना सार्की तथा पर्साका ३२ वर्षीय दीनानाथकुमार साह रहेका छन्। उनीहरूलाई प्रहरीले बुधबार  सार्वजनिक गरेको थियाे।

प्रहरी उपरीक्षक काजीकुमार आचार्यका अनुसार, पक्राउ परेका व्यक्तिहरूको साथबाट पैसा गन्न प्रयोग हुने एक थान मेसिन, दुई थान डिजिटल तराजु, चार थान मोटरसाइकल र विभिन्न कम्पनीका छ थान मोबाइल बरामद गरिएको थियाे।

प्रहरीले प्रारम्भिक अनुसन्धानपछि उनीहरूलाई थप अनुसन्धान तथा कानूनी कारबाहीका लागि राजस्व अनुसन्धान विभाग, हरिहरभवन पठाएको जनाएको छ।