कर्णालीका कृषि मन्त्री शाह अस्पताल भर्ना

कर्णाली प्रदेशका भूमि व्यवस्था, कृषि तथा सहकारीमन्त्री विनोदकुमार शाह मुटु सम्बन्धी समस्याका कारण अस्पताल भर्ना भएका छन्। मन्त्री शाहलाई मंगलबार साँझ स्वास्थ्यमा समस्या देखिएपछि काठमाडौंको महाराजगंजस्थित मनमोहन कार्डियोथोरासिक भास्कुलर एन्ड ट्रान्सप्लान्ट सेन्टरमा भर्ना गरिएको हो।

शाहको सचिवालयका अनुसार उनलाई मुटु सम्बन्धी समस्या देखिएको छ। चिकित्सकहरू उनको विस्तृत परीक्षण तथा उपचारमा संलग्न रहेका छन्। हाल उनको स्वास्थ्य अवस्थाबारे थप विवरण सार्वजनिक गरिएको छैन।

मन्त्री शाहको स्वास्थ्यमा सुधार होस् भन्ने कामना गर्दै परिवार, सहकर्मी तथा शुभेच्छुकहरूले चासो व्यक्त गरेका छन्।