अवैध रूपमा बसेका १० नेपालीलाई लिएर अमेरिकी चार्टर जहाज काठमाडौं आउँदै

अमेरिकामा अवैध रूपमा बसेका १० नेपाली आप्रवासीलाई लिएर अमेरिकी चार्टर जहाज आज काठमाडौं आइपुग्दैछ। अमेरिकी राष्ट्रपतिको रूपमा डोनाल्ड ट्रम्पले दोस्रो कार्यकाल सम्हालेपछि अध्यागमन नीति कडा बनाएसँगै विभिन्न देशका आप्रवासीहरूलाई निष्कासन गर्ने क्रम जारी रहेको छ।

अमेरिकी अध्यागमन कानुन उल्लङ्घन गरेको आरोपमा निष्कासन गरिएका नेपालीहरूलाई बोकेको चार्टर जहाज बुधबार बिहान १० बजे काठमाडौं अवतरण गर्ने तालिका छ। यसअघि पनि ट्रम्प प्रशासनको कार्यकारी आदेशपछि जनवरीमा ६, फेब्रुअरीमा २० र मार्चमा एक नेपाली गरी २७ जनालाई अमेरिका निष्कासन गरिसकिएको छ।

निकाला गरिएका तीन नेपालीलाई पानामा डिपोर्ट गरिएको भए पनि त्यसको कारण खुल्न सकेको छैन। आज काठमाडौं आउने चार्टर जहाज भोलि दिउँसो ३ बजे अल्बानिया हुँदै अमेरिका फर्किनेछ।

अमेरिकी सरकारले पहिलो चरणमा १४ लाख ४५ हजार ५४९ जना कागजातविहीन आप्रवासीलाई देश निकाला गर्ने योजना बनाएको छ। उक्त सूचीमा १,३६५ जना नेपाली रहेको उल्लेख छ। निष्कासनको यो क्रम जारी रहँदा नेपाली आप्रवासी समुदायमा त्रास फैलिएको छ।