सुर्खेतमा सवारी दुर्घटना : १३ जना घाइते

सुर्खेत, वीरेन्द्रनगर – सुर्खेतमा सवारी दुर्घटना हुँदा १३ जना घाइते भएका छन्। दैलेखबाट सुर्खेततर्फ आउँदै गरेको कर्णाली प्रदेश ०२००१ ख ०४९१ नम्बरको जीप सोमबार दुर्घटनाग्रस्त भएको हो।

जिल्ला ट्राफिक प्रहरी कार्यालय सुर्खेतका अनुसार उक्त दुर्घटना वीरेन्द्रनगर नगरपालिका-२ को बाङ्गेसीमबाट करिब १ किलोमिटर पश्चिमतर्फ घोडालोटे भन्ने स्थानमा भएको छ। प्रहरी निरीक्षक वकिल सुनारका अनुसार जीप अनियन्त्रित भई सडकबाट १५ मिटर तल खसेको थियो।

दुर्घटनामा घाइते भएका १३ जनाको सुर्खेतका विभिन्न अस्पतालमा उपचार भइरहेको छ। प्रहरीका अनुसार जीपमा कुल १६ जना यात्रु सवार थिए। दुर्घटनाको कारणबारे थप अनुसन्धान भइरहेको प्रहरीले जनाएको छ।