पेस्तोल र गोलीसहित दुई भारतीय नागरिक पक्राउ

पेस्तोल र गोलीसहित मकवानपुर प्रहरीले दुई भारतीय नागरिकलाई पक्राउ गरेको छ। पक्राउ पर्नेमा भारत बिहारस्थित सिहुहर जिल्ला धनहरा ग्रामका २२ वर्षीय धिरज कुमार र मोतीहारी बहरी ग्रामका  २६ वर्षीय दीपक कुमार रहेको प्रहरीले जनाएको छ।

जिल्ला प्रहरी कार्यालय मकवानपुरका अनुसार आइतबार साँझ ३:४५ बजे हेटौंडा उपमहानगरपालिका–१५, रातोमाटेस्थित प्रहरी चेक प्वाइन्टबाट विशेष सूचनाका आधारमा उनीहरूलाई पक्राउ गरिएको हो।

उनीहरू गौरबाट चितवनतर्फ आउँदै गरेको ना ८ ख ८७७३ नम्बरको भाडाको बसमा यात्रा गरिरहेका थिए। प्रहरीले बस जाँच गर्ने क्रममा धिरज कुमारको साथबाट १ राउण्ड गोली लोड भएको ९ एमएम अटो पेस्तोल र थप २ थान गोलीसहित ३ थान गोली बरामद गरेको जनाएको छ।

हाल पक्राउ परेका दुवै जनामाथि प्रहरीले थप अनुसन्धान गरिरहेको छ।