काठमाडौंमा सालकको खपेटासहित ४ जना पक्राउ

सालकको खपेटा तस्करीको आरोपमा प्रहरीले चारजनालाई पक्राउ गरेको छ। शनिबार काठमाडौंको गोकर्णेश्वर नगरपालिका–५, चामुण्डा चोकबाट ८ किलो ५०० ग्राम सालकको खपेटासहित उनीहरूलाई पक्राउ गरिएको हो।

पक्राउ पर्नेमा सर्लाहीका  ४८ वर्षिय कुवेरबहादुर स्याङ्तान,  ४० वर्षिय नुवाकोटका सन्तबहादुर गुरुङ,  २८ वर्षिय ओखलढुंगाका राजु विश्वकर्मा  र ४२ वर्षिय सुनसरीका मदन राई रहेका छन्।

 काठमाडौं उपत्यका अपराध अनुसन्धान कार्यालयको टोलीले विशेष सूचनाको आधारमा उनीहरूलाई पक्राउ गरेको प्रहरीले जनाएको छ।

प्रहरीका अनुसार, पक्राउ परेका व्यक्तिहरू काठमाडौंका विभिन्न स्थानमा बस्दै आएका थिए। उनीहरूलाई आवश्यक अनुसन्धान र कारबाहीका लागि डिभिजन वन कार्यालय पठाइएको छ।