नेपाल र म्यानमार उपाधि भिडन्तमा, सावित्राको उत्कृष्ट प्रदर्शन

 सावित्रा भण्डारीको उत्कृष्ट प्रदर्शनमा नेपालले आइतबार बलियो म्यानमारलाई २-२ को बराबरीमा रोक्दै अन्तर्राष्ट्रिय महिला फुटबल च्याम्पियनसिपको उपाधि भिडन्त तय गरेको छ।

त्रिपुरेश्वरस्थित दशरथ रंगशालामा भएको खेलमा म्यानमारले दुई पटक अग्रता लिए पनि नेपाली खेलाडीको आत्मबलले नेपाललाई पराजयबाट जोगायो। नेपालका लागि सावित्रा भण्डारी र साबिता रानामगरले गोल गरे भने म्यानमारका लागि मयत खिन र मे एचटेट लुले गोल गरे।

१२,६०२ दर्शकको जोशिलो समर्थनमा खेलेको नेपालले सावित्राको एक गोल र एक असिस्टको योगदानमा बराबरी निकाल्न सफल भयो। सावित्रा ‘प्लेयर अफ दी म्याच’ घोषित भइन्।

यो नतिजासँगै नेपाल र म्यानमारले समान सात अंक जोडे पनि गोल अन्तरका आधारमा म्यानमार विजेता र नेपाल उपविजेता बने। अब यी दुई टोलीले उपाधिका लागि पुनः प्रतिस्पर्धा गर्नेछन्।