तनहुँमा कर्मचारी कुट्ने वडाध्यक्ष पक्राउ

 तनहुँमा कर्मचारीलाई कुटपिट गरेको आरोपमा एक जना वडाध्यक्ष पक्राउ परेका छन्।

बन्दीपुर गाउँपालिका-६ का वडाध्यक्ष बलबहादुर गुरुङलाई प्रहरीले नियन्त्रणमा लिएको हो। उनले सोमबार बिहान वडासचिव नवीन भुसाललाई हातपात गरेका थिए।

वडाध्यक्षको हातपातबाट घाइते भएका वडासचिव भुसालको चितवन मेडिकल कलेज भरतपुरमा उपचार भइरहेको छ।

वडाध्यक्ष गुरुङलाई पक्राउ गरेर अभद्र व्यवहार मुद्दामा  जिल्ला प्रशासन कार्यालयबाट दश दिनको म्याद थप अनुमति लिई अनुसन्धान भइरहेको प्रहरी निरीक्षक राजु अधिकारीले जानकारी दिए।

वडा अध्यक्ष कप भलिबल खेल सञ्चालनको भुक्तानी प्रक्रिया अगाडि बढाउने विषयमा विवाद हुँदा वडाध्यक्ष गुरुङले सचिव भुसाललाई कुटपिट गरेका थिए।