हात्तीकाे आक्रमणबाट केरलाकाे मन्दिर उत्सवमा ३ जनाको मृत्यु, ३० जना घाइते

दक्षिण भारतको केरलामा मन्दिर उत्सवको क्रममा हात्तीको आक्रमणपछि भागदौड मच्चिँदा कम्तीमा तीन जनाको मृत्यु भएको छ भने अन्य ३० जना घाइते भएका छन्। घाइतेमध्ये केहीको अवस्था गम्भीर रहेको छ।

उक्त घटना बिहीबार साँझ केरलाको राजधानी तिरुवनन्तपुरमबाट करिब ४२२ किलोमिटर उत्तरमा पर्ने कोझिकोड जिल्लाको कोइलान्डी नजिकै रहेको मानकुलङ्गारा मन्दिरमा भएको हो।

प्रहरीका अनुसार स्थानिय व्यक्तिले पटाका पड्काएपछि मन्दिरमा उपस्थित दुई हात्ती आपसमा झगडा गर्न थाले। त्यसक्रममा मन्दिरको पर्खालको एक भाग भत्कियो, जसले गर्दा तीन जना मानिसको ज्यान गयो। मृतकमध्ये दुई महिला र एक पुरुष रहेको बताइएको छ।

यस घटनापछि मन्दिर परिसरमा भयावह स्थिति सिर्जना भयो। श्रद्धालुहरू भागाभाग गर्न थालेका थिए, जसका कारण ३० जना घाइते भएका छन्। घाइतेहरूमध्ये केहीको अवस्था गम्भीर भएकाले अस्पतालमा उपचार भइरहेको छ।

स्थानीय प्रशासन र प्रहरी घटनास्थलमा पुगेका छन् भने घटनाको थप अनुसन्धान भइरहेको छ। धार्मिक उत्सवमा हात्तीको प्रयोगको विषयलाई लिएर फेरि बहस सुरु भएको छ।