डल्लुमा सुनको गरगहना चोरी: तीन जना पक्राउ

डल्लुमा सुनको गरगहना चोरी गरेको आरोपमा प्रहरीले तीन जनालाई पक्राउ गरेको छ। पक्राउ पर्नेमा काठमाडौं महानगरपालिका-२९ निवासी ४१ वर्षाीय नरेन्द्र देउला, काभ्रे पनौती-१ निवासी कोमल बहादुर कार्की र भारतको कलकत्ता प्रदेश निवासी ५८ वर्षिय जागिर मलिक रहेका छन्।

प्रहरीका अनुसार माघ २६ गते डल्लुमा बस्‍ने ज्ञानरत्न मानन्धरको घरमा भाडामा बस्‍ने दोलखा, शैलुङ नगरपालिका-७ की सुनिता ठकुरीको डेराबाट सुनको गरगहना चोरी भएको थियो।

प्रहरीले पक्राउ परेका व्यक्तिहरूको साथबाट १ वटा सुनको नेक्लेस ,१ वटा सुनको सिक्री, १ वटा सुनको औंठी, गालेको सुनको एक ढिका, १ वटा सुनको तिलहरी, १ वटा सुनको कल्ली, १ वटा सुनको झुम्का, १ वटा सुनको मंगलसूत्र, सुनको मंगलसूत्रका टुक्रा ७ वटा र १ वटा सुनको सिक्कासहित  सुनका गरगहना बरामद गरेको छ ।

पक्राउ परेका तीनै जनामाथि प्रहरी वृत्त स्वयम्भूबाट थप अनुसन्धान भइरहेको प्रहरी स्रोतले जनाएको छ।