एक करोड धरौटीमा रविलाई छाड्न रुपन्देही अदालतको आदेश

सहकारी ठगी प्रकरणमा जिल्ला अदालत रुपन्देहीले रास्वपा सभापति रवि लामिछानेसँग १ करोड रुपैयाँ धरौटी मागेको छ । आइतबार थुनछेक बहस सकिएपछि न्यायाधीश प्रह्लादकुमार योगीको इजलासले एक करोड धरौटीमा रिहा गर्न आदेश दिएको हो ।

बुटवलस्थित सुप्रिम सहकारी ठगी प्रकरणमा लामिछानेलगायत २२ जनाविरुद्ध पूरक मुद्दा दायर भएको थियो । धरौटी बुझाएपछि लामिछाने रिहा हुनेछन् । त्यसो त अहिले पनि लामिछाने परिवारकै जिम्मामा थिए ।

लामिछानेसँग यसअघि पोखरास्थित सूर्यदर्शन सहकारी गठी प्रकरणमा ६५ लाख र काठमाडौंस्थित स्वर्णलक्ष्मी सहकारी ठगी प्रकरणमा ६० लाख रुपैयाँ धरौटी मागिएको थियो । दुई अदालतमा धरौटी बुझाएर उनी रिहा भएका थिए । अब लामिछानेमाथि चितवन जिल्ला अदालतमा मुद्दा दायर गर्ने तयारी छ ।